Cé Orquestra Pantasma convídavos á Festa da República Galega

Estámoslle moi agradecidos ó Cé orquestra Pantasma que convida a todas e todos a unha festiña das boas.... 

Acudide! Acudide! Vinde todos a bailar...á Festiña da República Galega trailalá!!!

Cé Orquestra Pantasma no YouTube: https://www.youtube.com/channel/UC849ZMjaM3_vAT_B4AAk7rA?feature=watch

82 ANIVERSÁRIO DA REPÚBLICA GALEGA

            "FESTA DA REPÚBLICA GALEGA"
           29 JUNHO-ORDES - VELHA ESTAÇOM DO COMBOIO

                                    PROGRAMA DA FESTA

12:00 LNB-ABERTO DA REPÚBLICA
13:00 Sessom Vermute com O COMBOIO REPUBLICANO
14:00 JANTAR POPULAR (cada quêm leva a sua comida)
15:30 JOGOS POPULARES e agasalhos para as CRIANÇAS
17:00 Apresentaçom da BANDEIRA DA REPÚBLICA GALEGA
         Coloquio - Arengas - Actuaçom MINI E MERO
18:00 REPICHOCA LITERÁRIA
 A Porta Verde do Sétimo Andar, Redes Escarlata, Batallón Literario da Costa da Morte... Ribadulla Corcón, Xosé Iglesias, Eduardo Estávez, Rosa Enríquez, Silvia Penas, Elvira Riveiro, Alba Méndez, Concha Rousia...
         Actuaçom de XABIER DÍAZ
20:30 ACTUAÇONS:
         - Lydia Botana (Bolboreta)
         - O Leo i Arremecághona
         - Cé Orquestra Pantasma
         - Xenderal
        
( As entregas de prêmios da bilharda seram à tarde. Há zona de acampada e também bochinche a preços populares)

ORGANIZAN: 
A.C. Foucelhas (Ordes) 
A.C. Lucerna (Cerzeda)
A.C. A Revoltaina Cultural da Beira de Bergantinhos (A Laracha)

Video-Estalo de apoio á Festa e ó Aberto da República Galega!!

 

Ahí vai un pequeno video-estalo de apoio á Festa e ó Aberto da República Galega , o brutal é sobre todo a banda sonora do " Comandante Suso" un histórico e incendiario blues-man alebrestrado da mariña antigo colaborador de Skornabois que volta á liña do fronte disposto a todo...

                    unha moi forte aperta e Adiante a República Galega!

XABIER DÍAZ na Festa da República Galega

Xabier Díaz Carro, nado na Coruña o 22 de agosto de 1969, é un cantante, compositor e investigador do folclore tradicional galego.

Xunto a Guillerme Fernández codirixe o programa Tres peixes voando, da Radio Galega. Colaborou en directos con artistas como Luar na lubre, Amancio Prada, Os Cempés, Marful, Nordestin@s, Kepa Junkera ou Uxía.

O seu primeiro contacto coa música foi aos dez anos cando o seu avó lle regalou a primeira gaita a cambio de que asistira a clases. Grazas a este acordo familiar desenvolveu a súa paixón pola tradición e a antropoloxía. Para Xabier Díaz é imprescindible coñecer a música antiga para construír calquera xénero musical hoxe, incluso os máis modernos.
Comeza a súa carreira discográfica coa publicación de Músicas de salitre (2004) xunto co guitarrista Guillerme Fernández. Un primeiro traballo no que se revelou como cantante e compositor de talento. Optou como finalista aos Premios da Academia da Música no 2005, e acadou o terceiro posto na edición dos galardóns La Opinión.
Xabier Díaz compaxina as súas facetas de músico e compositor cunha laboriosa actividade como investigador e compilador do folclore tradicional galego. Froito deste traballo editou Coplas para Icía (2007) coa participación a Pedro Lamas e Suso Iglesias. Disco no que verte un discurso moi cosmopolita á vez que pegado á terra.
Na actualidade combina varios proxectos. É cantante titular da compañía Nova Galega de Danza coa que realizou os espectáculos Alento, Engado e Tradicción. No ano 2005 foron finalistas nos Premios Max como Mellor Espectáculo Revelación por Alento. Máis recentemente, entrou a formar parte do grupo Berrogüetto, onde participa dende comezos do 2008. En solitario traballa xa no que será o seu terceiro disco, A lírica do silencio, de novo na compaña de Guillerme Fernández. Dirixe e copresenta o espazo "Tres peixes voando", da Radio Galega, xunto con Guillerme Fernández.

Ao longo da súa carreira compre destacar numerosas colaboracións en discos e concertos, con diversos artistas e formacións como  Luar na Lubre, Amancio Prada, Os Cempés, Marful, Nordestinas, Kepa Junquera ou Uxía.
Participou en espectáculos singulares como Descarga ao Vivo Cuba - Galiza (2009), intercambio musical entre creadores galegos e cubanos; Cantos na Maré (2005 e 2008) colaborando con artistas do ámbito da lusofonía como Chico Cesar, Paulinho Moska, Sergio Godinho ou Sara Tavares; ou Ao pe da letra, espectáculo que serve como punto de encontro de varios proxectos e artistas galegos, procedentes de premisas e universos musicais diferentes, que queren tomar a palabra coa vontade de situar a voz no centro das súas creacións.
Desde que fora mestre e logo director da escola de Música e Baile Tradicional do Concello de Ames, segue a súa actividade docente impartindo cursos de percusión e canto tradicionais en diferentes programas de escolas e conservatorios.

LYDIA BOTANA "BOLBORETA" na Festa da República Galega

Lydia Botana, “Bolboreta”, músico multinstrumentista natural de Culleredo (A Coruña) ten formado parte de diversas agrupacións tanto rock, pop, reggae/ska, coma esembles de percusión, bandas sinfónicas ou dirección de coros. Titulada polo Conservatorio Superior de Música de A Coruña en Pedagoxía da Linguaxe e a Educación Musical en decembro de 2011. E ten a titulación do Grado Profesional de piano cursado entre o Conservatorio de Culleredo e o da Coruña.
Presenta un directo con posibilidade de varios formatos, dende o acústico en solitario ata a incorporación dunha banda que recentemente a acompaña tocando os seus temas que fusionan xéneros musicais coma o latin, o rock, o pop, o ska… e versións que abranguen dende o tradicional “Eu chorar chorei” ata o reggae de Bob Marley.
Neste verán Bolboreta xirará cunha banda conformada por Paco Cerdeira (Zënzar, Mamá Cabra) á guitarra eléctrica, Torroncho (Ruxe Ruxe, An bia, musical Galicia Caníbal) ó baixo e o pequeno Anxo Silveira (Talesien,Tolemia) á batería.

Xunto con diferentes grupos, participou en festivais e circuitos de música coma: Rock Marino 2004 (A Coruña) con Deixaví; xira co Coro Verdianeum de Parma (Italia) realizando a B.S.O do lm “L´uomo che verrâ” en 2009; 7º Busker´s Festival Barcelona, X e XI Foundation Reggae Festival (Everton Blender, Fidel Nadal, Andrew Tosh- Culleredo, A Coruña), IX e XI Festival Reperkusión (Ourense), Brincadeira 2011 (Europe, Rosendo, La Kinky Beat- Ordes, A Coruña), Nordestazo Rock 2011e 2012 (Che Sudaka/Dios ke te crew- Malpica, A Coruña), Castañazo Rock 2011 (Reincidentes, The Locos- Chantada, A Coruña), Festigal 2012 (La Phaze, Zënzar- Santiago de Compostela), Brincadeira 2012 (Calle 13, Status Quo- Cambre, A Coruña), etc.
En febreiro 2012 grava, íntegramente, “No me importa nada” e “Walk away” ó ser convidada pola Universidade de Paul McCartney en Liverpool onde actuou na mítica sala The Cavern. En agosto 2012 grava tamén “Quen nos queima“, misturado por Javier Abreu coa colaboración na voz de Garcia Mc (Dios ke te crew) e ó baixo Sebas (Che Sudaka), tema que podes escoitar na Radio GUIEIRO.

En 2012, ao abandonar a banda coa que xirou polo estado dende 2008 como teclistas/percusionista de ska/reggae/punk coa que gravou o disco Sin fronteras (Skarallaos), comeza a formar parte de novos proxectos como Labreg*s do tempo dos Sputniks na batería e o acordeón xunto co Leo Arremecaghona e García Mc. E forma parte da Banda Fura Fura…

Colabora asiduamente coa banda de rock Zënzar como acordeonista e á voz. E tamén coa banda de punk Konfl ikto aos teclados e ó acordeón.

Ten colaborado nos directos de bandas coma La Pegatina con Xurxo Souto, Canteca de Macao, Dakidarria, Dios ke te crew, Baokas 46, Chimango, Desorden Público, … Ten tocado tamén con Gogol Bordello, Manu Chao, Joan Garriga, O´Funkillo…

No 2013 saiu elixida polo alumnado dos institutos de secundaria de Galiza coma gañadora do Cantalingua e participou nos concertos organizados polo Correlingua. Participou no tributo a Rosalía no Teatro Rosalia de Castro cantando coma solista acompañada pola Banda Municipal de A Coruña.
Neste ano estrea tamén o seu proxecto chamado “De aquí para alá”, un concerto didáctico para público infantil con músicas do mundo.
Na actualidade encóntrase gravando o seu primeiro cd en solitario e pódese atopar en recopilatorios coma o 7º Buskers Festival Barcelona (2011), IX Festival Reperkusión (2011), e en solitario ten publicado coma Bollboreta o tema “Quen nos queima” no recopilatorio “Lo peor de la rumba” xunto con Manu Chao, Amparo Sánchez, La Pegatina, Che Sudaka…

XENDERAL NA FESTA DA REPÚBLICA GALEGA

Quen dixo que a música non amansaba as criaturas? E máis diría que tolea por ela. E non por calquera , non! Pola de XENDERAL!!!. Señora, deixe de comprarlle música dos teletubis e outros debuxos e traiaos a Festa da República Galega. Os rapaces sempre sabén o que é bo. E non só os rapaces. Gende vainós facer saltar coa súa música ese día.

A BANDEIRA DA REPÚBLICA GALEGA

O sábado 29 de Xuño, 82 Aº da proclamación da República Galega, presentarase na Festa da República Galega na Pontagra, Ordes, a bandeira da República Galega.

"O LEO i ARREMECÁGHONA" na festa da República Galega

Alá polo ano 97, unha maqueta gravada cunha minicadea e un micro no centro (pola reverb) dun salón de Vigo cunha guitarra acústica rescatada do lixo chegaba ás mans de alguén que chamou O Leo i os Endinados para tocar no II Félix Rock de Vigo, xunta bandas como Babes in Toyland ou Toy Dolls. Mentres viña a data do concerto, O Leo fíxose acompañar virtualmente (aínda nunca chegaron a tempo a un concerto) de Arremecághona!!!, dúo de tamboril e cunchas inspirado en Metallica e no seu Enter Sandman . Un ano despois, coa entrada para o concerto de Vigo xa mercada, O Leo i Arremecághona!!! foron requiridos para abrir os directos da Xira Galega do Veintegenarios de Albert Pla. Tiveron que lle revender a entrada a un colega. De aí saíu o xermolo deste disco, Suspiros de Kaña , gravado e mesturado por Pablo Iglesias no febreiro de 1998.

As mil copias dese disco nunca foron distribuídas máis ca en dúas tendas de Vigo e dúas de Santiago (polo propio autor). Tampouco se chegou a facer xira de presentación, aínda que o disco si foi posto en Satelitrés e en La Baía de Radio 3 e por aí saíron tres bolos no Festival de Teatro de Peto de Donosti. A partir de aí, o Leo i Arremecághona!!! tocaron no III Félix Rock e en todo canto minifestival e pub se prestase a acollelo, entre eles a Fiasta de Goián, no Baixo Miño, onde máis de 2.000 persoas corearon os seus temas na II edición do festival e onde máis de 400 se xuntaron no Entruido do ano seguinte para inaugurar, no furancho da Once (Asociación entruideira), o I Festival da Taíña, vixente inda hoxe. O Leo considera Goián como a súa patria musical. De feito O Leo arrenega musicalmente da súa patria verdadeira, Matamá, en Vigo, onde o vetaron expresamente –a el e ó festival enteiro– polo contido das súas letras.

Ao longo destes anos tamén fixo músicas e letras para espectáculos teatrais, en que participou asemade como actor: As Presidentas , d' A Factoría Teatro e Vendetta , de Berrobambán Teatro, espectáculo punk para pubs que aínda deixou de representarse no febreiro deste ano 2006. Agora prepara o disco Aghomita, campión! , en que vai colaborar con todo tipo de acompañamentos, dende dj ata bandas de música, e o directo Sigho (Vivo)!, recompilación audiovisual do seu espectáculo en vivo.

Contacto: arremecaghona@gmail.com

 http://arremecaghona.blogspot.com/

"CÉ ORQUESTRA PANTASMA" na festa da República

Baixo Cé orquestra pantasma agóchase o vigués César Freiria, músico autodicacta e apaixoado dos instrumentos musicais. Comezou a súa andaina musical aos oito anos dentro da música tradicional e dende aquela non deixou de navegar polos variados estilos da musica popular, chegando a formar parte de grupos tan dispares entre si como A Roda ou banda de punk Oxtiax ke te Pariu.
 http://www.ceorquestrapantasma.com/

SIDRA GALEGA PRA FESTA DA REPÚBLICA

Outra das novidades que vai haber ese dia, e a presentación da SIDRA DE INVERNO GALEGA. A organización en vistas do éxito do ano pasado tamén coa sidra de Bergantiños, este ano fixo exclusivamente para a festa da República sidra de inverno. Elaboradas só con mazáns autóctonas (albaronas, verdeales, sapas, vilelas...) de Soandres, na Laracha, recuperouse esta tradición case esquecida. Só vai a ser posíbel probala ese día, xa que esta sidra artesanal non está a venda en ningún lado.Un bo día para celebrar bebendo e comendo con produtos do país. Quen queira tamén pode traer a dar a coñecer e vender os seus produtos da terra.

MANIFESTO DO 81 ANIVERSÁRO

Brais Zas foi o responsável em ler o manifesto

“O problema primordial que os nazonalistas deben plantearse non é, pol-o conseguinte, a implantazón da Repúbrica, ou a continuación da monarquía en Hespaña, sinón o de libertarse da domeazón hespañola.” Corría así a tinta no xornal A Fouce en febreiro de 1931.

Meses depois, o 23 de junho desse mesmo ano, o Conselho de Ministros acorda as suspensom definitiva da construçom do caminho-de-ferro entre Samora e a Corunha. Indalecio Prieto, responsável de Fazenda, nom o considera rentável. Os 12 mil trabalhadores “carriláns” começam umha greve histórica que no momento mais álgido do conflito leva-os a proclamar a República Galega.

Bem podia ser o mês de junho de 2012, com as classes populares galegas cada vez mais indignadas polos atracos da banca, o desmantelamento da sanidade pública, os ataques à educaçom ou o desleixo face o meio ambiente.

Madrid já nom é o centro da tomada de decissons. Berlim resgata a economia espanhola e Berlim decide por todos os territórios encerrados sob o domínio estatal. Contra os ataques que lhe restam soberania aos galegos e às galegas compre chamar com mais força pola Segunda República Galega.

E o berro que proclama um povo galego soberano ha começar aqui, banhado pols augas do Lengüelhe e com a força das gorjas chegadas de toda a comarca de Ordes e de Bergantinhos à Pontragha. Porque o sermos soberanas e soberanos nom lhe é alheio a nengum recuncho desta terra. Por isso, lembramos a arenga que o Comité Revolucionário Arredista Galego de Havana lançava a toda a emigraçom da ilha ao conhecer-se a notícia da proclamaçom da República Galega de 1931. As palavras de Fuco Gomes ainda nos servem hoje de reclama e como exercício de memória para nom esquecer essa parte da história galega que permanece sequestrada. Este documento inédito resgatado ainda este ano rematava assim…

Irmaos galegos:
Ergamol-a testa algunha vez, ollemos ao ourizonte, revistámo-nos de vaor cívico e aicedamos âs súpricas da nosa Galiza, da Galiza qui percisa da ajuda de tudol-os seus fillos nista hora suprema, pra ceibar-se da oprobiosa escravitude á qui a tên sometida o despótico Centralismo hespañol. Sumémo-nos â Revoldaina Arredista Galega aitual, ben enviando recursos pra sostêl-a, ja embarcándo-nos pra, unha vez na nosa Patria, empuñal-as armas e loitar valentemente até morrer ou venzer na contenda.


Viva Revoluzón Arredista Galega!!
Viva Galiza Independente!!

A.C. A Revoltaina Cultural da Beira de Bergantinhos.
A.C. Lucerna
A.C. Foucelhas

ABERTO DA REPÚBLICA

BILLARDA

Sábado 29 de Xuño as 12 H. na estasión vella do tren na Pontaghra en Ordes varios colectivos volven a orghanisar un ano máis a Festa da República Ghalegha. Este ano celebrase ó 82 aniversário da súa proclamasión. Entre os actos e actividades proghramadas para ese día está a do ABERTO da REPÚBLICA.

Preparade os paláns e afiade as billardas que vai ser un aberto bravo. Billardeiras e billardeiros de todolos curros do país van a competir por ghañar este III Aberto da República.

Xa sabes, antes de vir, fecha as ghaliñas por se che vai o raposo; prende o can non vaia a ser que morda a visiña; trae ao teu home, a túa muller e aos cativos. E non esquezas tamén de traer  a túa soghra, que mentres xoghas a billarda deixala na sesión vermute bailando un agharrado con alghún rapas novo da orghanisasión. O soghro que se agharre no bochinche a unha sidra do país. E se non que partisipen tamén no aberto.

O sitio é criminal. Unha antigha estación co riú ao lado. Non o penses máis  e trae a túa tortilla, empanada, rixóns… e xanta alí con nós.

Máis informasión:  http://festadarepublicagalega.blogspot.com.es/

Xaime Luaces, do Commando gomessende, para a Rª Gª

A nós, os galegos, de tanto buscar maneiras de ser no que nos é alleo, sempre fomos máis propicios a querer non facer que a facer, e píntanos ben cando nos pinta ben. Por iso aqueles que non queremos ser súbditos nin de deuses nin doutros homes, quédanos a solución de ser republicanos, pois a República non fai falla facela; a República é participar, compartir, e iso  é intrínseco, no que se dá en chamar unha sociedade civilizada.

       Noutra terminoloxía dáselle en chamar Patria, ou sexa ao que nos chamamos « A Terra », e aí xorde o desexo de que sexa Nosa Terra, sempre desde a Nosa República -ben entendido. Eu non coñezo outra maneira -irmá de todas as outras, por ser cidadáns, ou aldeáns do mundo (esta máis apropiada definición de nós e dos que habitamos a Nosa Terra) que pexorativaron os viláns –definición que eu pexorativo – precisamente porque nós, nunca xamais, exercemos nin de patróns de ninguén, nin de nós mesmos, senón persoas libres, tanto cidadáns como aldeáns. A liberdade tal que ela é, non estraga nin Terra nin os suxeitos dela, cousa que si fan os pexorativos viláns, que están asentados nesta Terra  Nosa, coma se deles fose tamén, e –moitas veces- fan todo para estragala e para que sexa súa. Visto está que a súa concepción de patria non é a nosa, son os cartos.

       A Patria e a Terra non son os bípedes que poboamos nela, nós non somos máis que habitantes transitorios da Nosa Terra. Moitos dende xeracións lonxincuas viven nela coma sinxelos turistas, e son ben deles. Todo isto fainos asemellar que son poucas as xentes que, ao final, quedan integradas verdadeiramente na Terra e, entre elas, moitas que chegaron de turistas e quedaron para facer parte non integrada de nós, renunciando a ser e a estar, pero tamén sen querer deixar de selo. Por isto é esta proclamación da Nosa República Galega.

XENDERAL colabora e anima a participar na festa

NESA REPÚBLICA NOSA

NESA REPÚBLICA NOSA.

Ouh, Avelino, amigo. Ti ben sabes que hai persoas que na vida
nos irradian autenticidade, nobreza, ...evocando os recendos da Nai,
da orixe como fonte de nós, da nosa esencia.
Ti ben sabes que hai persoas que polinizan cultivos honestos,
cheos de porvir e de sentimentos sans, dos que cabalgan na música da natureza,
descubrindo orballos e amenceres, que buscan no solpor aquel pouso de sosego de luz,
de erguermos na loita a cada intre e que escoitan a verba pura en arelanzas.
Ti ben sabes, Avelino, que hai persoas que espertan esperanzas durmidas
aquelas, as dunha Galiza en pé que se espreguiza,
chea de horizontes aínda por descubrir, presentidos xa, desde a noite dos tempos.
Ti ben sabes que hai persoas que son sabias de humanidade e de coñecemento,
de bondade e honra, de honestidade en auga limpa e xenerosa
e que berran cubertos da carraxe diante o posible e, coma cheos de maxia,
alentan para accionar as forzas todas desde o profundo do ser,
desde esa alma oculta que se desbloquea, para respirar de novo un aire puro,
reparador de tanto mal que nos fixeron e que seca as bágoas,
a impotencia, a desolación e a nube gris que nega calquera falta de porvir.
Ti ben sabes, Avelino, que hai persoas que camiñan sen facer ruído,
con humildade, coma quen aloumiña un fillo na noite e en silencio,
aloumiñando sentimentos, coma quen canta unha anaina suave e tenra,
na sombra do cuarto escuro, para adurmiñar os medos e que esclareza
unha noite de moitas lúas, e infindas estrelas.
Avelino, ti ben sabes tamén, que hai persoas que non usan máscaras
nin disfraces para ocultarse, que pasan caladas e desapercibidas para ofender,
para enganar, para meterse nas sombras do corrupto. E son tantos e tantas.
Sabes ben, pola contra, que hai persoas que deixan un ronsel de elegancia
en dignidade,  de simpatía.
Hai persoas que pasan e deixan memoria do noso ser, ...ti fuches un deles.
Por iso te lembramos agora, precisamente agora que hai tanta corrupción e tanto medo,
que hai tanto desespero e negro agoiro, ...non que a única solución é loitar,
berrar xuntos de novo: que si se pode, que é xusto e necesario levantarnos e dar a cara,
que non nos encollemos diante de ninguén, que iremos coa palabra precisa e clara,
coa man botada para axudar, pero coa cabeza ergueita para non claudicar
defendendo o que é noso e corresponde, como pobo e nación,
como donos de nós e do noso, dese noso destino que nos fará seres dignos da Mai
a pesar dos tantos fillos renegados e sen raíces,
na confianza de repoñernos xuntos con tantos outros que para vivir
tiveron –de novo- que marchar lonxe, desacougados e tristes
...mentres moitos calan, pasivos, vendo pasar o aire.
O noso compromiso, Avelino, segue a ser o teu compromiso de sempre.
Estaremos en pé, para accionar e dar forza, para xuntar e conciliar vontades,
para defender o Noso, a nosa Dignidade de Pobo:
Nación que ergue no orgullo de saberse, na memoria de estar,
e na honra de ser quen somos, diante de nós e diante do mundo.



Mero, 15 de maio de 2013

A BANDEIRA DA REPÚBLICA GALEGA

Mero Iglesias fala sobre a Bandeira da República Galega, que se vai a presentar o sábado, 29 de Xuño de 2013, en Ordes, na Festa da República Galega. Unha República de liberdades e de soños.

REPICHOCA LITERÁRIA

A diversidade das vozes poéticas galegas estará presente na Festa da República Galega

Os versos voarám livres e libertadores polo ar, envolvendo o espaço da antiga estaçom da Pontraga. Versos em diversidade de estilo, geraçom e voz, que falarám do anseio de liberdade deste povo. Versos com o fogo revolucionário de todas as luitas de todos os tempos, versos com as luzes da inteligência e a beleza da virtude.

Versos justiceiros, criativos, que sabem a mar, que sabem a terra, que conhecem o canto do cuco a nos anunciar a renovadora primavera, que dançárom com o reclamo do golfinho franqueador das ondas.

Versos que venhem do Milhadoiro, ou que venhem de Vigo, ou da ria de Ferrol; da Costa da Morte ou do Morraço. Versos que franqueiam portas, que tecem redes, que formam em batalhom a disparar salvas pola liberdade. Ribadulla Corcón, Xosé Iglesias, Eduardo Estávez, Rosa Enríquez, Silvia Penas, Elvira Riveiro, Alba Méndez, Concha Rousia…sonoridades e tonalidades conformantes de umha mágica fraga de palavras (a fraga, a república essencial, a do retorno, revolucionária por ideal e rotundamente matricial)

Constroímos entre as vozes todas, esse manto chamado poesia, voz do povo, melodia coral. O maior poema é o que escrevemos no ato heróico de sermos povo aínda. Eco dessa batalha pola vida é cada verso que conceve a voz poética.

Na Festa da República Galega, um mostrário de movimentos, coletivos, iniciativas com a poesia como centro do seu agir, a travês do tempo e no nosso país ( A Porta Verde do Sétimo Andar, Redes Escarlata, Batallón Literario da Costa da Morte…)

CARTAZ DA FESTA " 82 ANIVERSÁRIO"

 Olá!

O  sábado 29 de junho vai ter lugar na Pontagra, velha Estaçom de Trem de Ordes, a FESTA DA REPÚBLICA GALEGA, um acto para comemorar o 82 aniversário da proclamaçom desta data que atinge já a sua 3ª ediçom. A festa começará arredor das 12h e haverá sessom vermute, jantar (cada quem deverá traer a sua comida!), e muitas actividades ,concertos pola manhá e a tarde.

As pessoas que organizamos o evento, de associaçons da Laracha, Cerzeda e Ordes, gostariamos de convidar-vos a compartir com nós este dia. Pretendemos que o tecido associativo de todo o país tenha um espaço para exponher os seus trabalhos ou vender o seu material. Podedes traer um pequeno posto para dar-vos a conhecer, ou se o preferides simplesmente achegar-vos e unir-vos à festa!

PROGRAMA

12:00 LNB – ABERTO DA REPÚBLICA DE BILHARDA 82º ANIVERSÁRIO

13:00 Sessom vermute com o COMBOIO REPUBLICANO

14:00 JANTAR POPULAR (cada quém leva a sua comida)

15:30 Jogos populares para as CRIANÇAS

17:00 APRESENTAÇOM DA BANDEIRA DA REPÚBLICA / COLÓQUIO / ARENGAS

18:00 REPICHOCA LITERÁRIA

20:30 LEO i ARREMECÁGHONA!! / CÉ ORQUESTRA PANTASMA / XENDERAL

Viva a República Galega!

A.C. A Revoltaina Cultural da Beira de Bergantinhos

A.C. Lucerna

A.C. Foucelhas